Graduation sa Bahay Pagbabago

Graduation sa Bahay Pagbabago

Disyembre 14, 2016

(Paalala: Sadya pong  hindi ipapakita ang mga mukha ng mga reformist para sa kanilang privacy at confidentiality.)

"Kaya't kung nakipag-isa na kay Cristo ang isang tao, isa na siyang bagong nilalang. Wala na ang dati niyang pagkatao, sa halip, 

ito'y napalitan na ng bago."

2 Corinto 5:17

     Narinig ko ito sa testimony ng isa reformist sa Bahay Pagbabago. Hindi ko sila personal na kilala pero sa pagsasalita nila sa harapan para sa kanilang testimony ay ramdam ko ang kanilang sinseridad sa kanilang pagsisisi at pagbabago. Hindi maiwasan ng ilan ang maluha dahil sobrang nakaka-touch naman talaga at may kurot sa puso kung pakikinggan ang kanilang mga kwento. Silang lahat ay may iba-ibang istorya kung bakit sila nakatikim at gumamit ng droga, at dahil din sa drugs ay nasira ang buhay pati na ang pagsasama ng pamilya. Hindi lahat ng kwentong ganito ay nagtatapos sa wala, ang 24 na mga lalaki na sumailalim sa Reformation Program ngayon ay nakatapos na sa loob ng kanilang animnapung (60) araw na pananatili sa loob ng Reformation Center o "Bahay Pagbabago." Nakatutuwang malaman na napakalaki na ng kanilang pinagbago mula ng sila ay pumasok sa Bahay Pagbabago. 

     Matatandaang eksaktong ika-100 araw ng panunungkulan ni Mayor Ferdie V. Estrella ng mailunsad ang Bahay Pagbabago. Ito ay isang pagsunod sa adbokasiya ng ating Pangulong Rodrigo Duterte sa laban sa ipinagbabawal na gamot. Ito rin ay aking isinulat sa aking nakaraang blog. Ang Pagbubukas ng Bahay Pagbabago. Kaya naman ngayon, Disyembre 14, 2016 ay itinakda ang pagtatapos ng unang batch ng reformist. 

     Dumating ang mga ka-anak ng mga reformist na sabik na silang makasama ulit sa kanilang paglabas. Binati sila ng butihing maybahay ni Kapitan Ricky "RR" Romulo (Brgy. Captain ng Brgy. Tiaong) na si Ginang Emieh Romulo. Nagpasalamat kay Mayor Ferdie para sa isang napakagandang pamasko para sa mga reformist, ang regalo upang makapag bagong buhay. Nagpasalamat din siya sa mga tumulong upang maisagawa ang napakagandang adbokasiya na ito. Ganun din si Ginang Jo Labasbas na head ng MSWDO. Idinagdag niya na hindi lamang hanggang sa reformation center iaabot ang pagtulong, aalamin nila isa-sa kung ano ang pangangailangan ng bawat pamilya ng mga reformist, maging gamot man ito, pangkabuhayan at kung ano pa ang maaaring maitulong.

Mrs. Emieh Romulo (Maybahay ni Kapitan Ricky "RR" Romulo)
Tiaong

Ma'am Jo Labasbas, MSWDO

     Nagpaabot din ng pagbati ang Hepe ng PNP ng Baliwag na si Hepe Froilan Uy. Sinabi niya na napakalaki ng ipinagbago ng mga reformist at mula sa kanilang batch ay hikayatin nila at sila mismo ang maging patotoo kung ano ang ginagawa sa Bahay Pagbabago. Sabi nga niya, "Spread the news na dito sa Baliwag, ang lahat ay may pagkakataon na magbago." Ang susunod na batch ng mga reformist at maguumpisa sa ikalawang linggo ng Enero 2017. 

Hepe Froilan Uy, Hepe ng PNP Baliwag

Masaya naman ang ating Mayor Ferdie V Estrella dahil sa nakita niyang mga pagbabago sa mga reformist. Sabi niya, "Noong unang kita ko pa lang sa kanila sa pagdating nila sa Bahay Pagbabago ay mga humuhulas! Pero ngayon ay mga poging-pogi na sila!" Natutuwa siya sa 24 na reformist dahil sila mismo ang mga unang nagpunta sa Bahay Pagbabago upang sumuko at magpasailalim sa reformation. Ayon kay Mayor, sa ngayon na nakita niya ang pagbabago ay hindi niya ito bibigyang ng isda, bagkus, sila ay bibigyan ng Pangisda, upang sila mismo ang gumawa ng paraan para sila ay kumita at tuluyang mabago ang buhay. Paalala nya lamang sa mga reformist na wag sayangin ang pagkakataon na ibinigay sa kanila at ituloy na ang pagbabago. Sana ay makapagdala rin sila ng mga gustong matulungan para sa pagbabagong buhay. Nagpasalamat din ang ating Mayor sa mga pastor at mga volunteers na kasamang gumabay sa mga reformist sa kanilang 60 days na pamamalagi sa Bahay Pagbabago.

Mayor Ferdie V Estrella

    Ang mga tulad nila ang dapat na bigyan ng pagmamahal. Kaya naman sila ay nalulong sa bawal na gamot ay dahil maaaring hindi nila nadama ang pagmamahal mula sa kanilang mga pamilya. Bigyan natin sila ng pagkakataon na magbago. 

All-Star Celebrity Basketball

     May mga hinahangaan ka bang mga gwapong artista? Ano ang mararamdaman mo kung ang mga hinahangaan mong mga artista ay abot tanaw o abot kamay pa nga, nakapag-selfie pa! Madami ang nag-abang na mapanood ito kaya naman bumili sila ng ticket upang makapasok sa Baliwag Star Arena at makapanood ng live! Sa mga hindi nakapanood, narito at ikukuwento ko sa inyo.

     Disyembre 11, 2016 ay inabangan ng mga Baliwagenyo ang laban ng Basketball tampok ang mga hinahangaang artista laban sa koponan ng ating Mayor Ferdie V Estrella. Ito ay isang proyektong handog ng Baliwag Tourism Council para sa mga mamamayan ng bayan ng Baliwag. Katatapos pa lamang ng nakaraang laban ng Alab Pilipinas at Kaohsiung Truth ng Taiwan (malamang ang iba nga ay hindi pa nakaka-get-over sa pagkapanalo ng Alab Pilipinas) ay may bago na namang inabangan ang mga taga Baliwag. Maaga pa lamang ay naglabas na ang Baliwag tourism Council ng mga tickets na nagkakahalagang 100 pesos at 200 pesos para mapanood ng mga fans ang mga nagwagwapuhang bawat miyembro ng dalawang koponan. Paano ka ba namang hindi bibili ng ticket kapag ang mga artistang sina Benjamin Alves, Joseph Bitangcol, Genesis Gomez, Mike Magat, Jay Manalo, Rocco Nacino, Nico Nicolas at Jomari Yllana ang nakapaskil na mga litrato sa poster. Maski naman ako ay na-excite din na makita sila.. sayang at hindi nga lamang nakarating si Jomari Yllana pero... (Aminin mga girls, naexcite din kayo hindi ba? malamang ay hindi pa kayo maka-get-over sa mga selfies ninyo sa mga artista na nabanggit ko!) 

     Hindi naman nagpahuli ang koponan ng ating Mayor FVE na sina, Lowell Tagle, Baldo Torres, Christopher Alvaran, Ambet Jose, Jeffrey Diaz, Rodrigo Baltazar, Randy Bernabe, Ear Justin Antonio, Wendell Centeno, Ronaldo Rivera at iba pa. Pagdating pa lang sa Baliwag Star Arena ay nagwarm-up na agad sila habang hinihintay ang kanilang mga makakalaban. Nag-umpisa nang maghiyawan ang mga fans noong natanaw nila na isa-isa nang lumabas ang mga artistang kanilang hinahangaan. Naghiyawan at tumili pa ang iba! Sa umpisa pa lang ay ramdam na ng lahat na magiging masaya ang laro nila. 

Nico Nicolas, Benjamin Alves, Jay Manalo, Mayor Ferdie V Estrella, Mike Magat, Rocco Nacino, Genesis Gomez at Joseph Bitangcol

MFVE Team

Naging masaya naman talaga ang laro at walang nagkakapikunan. Sige naman ang hiyaw ng mga fans kapag nakaka shoot ang kanilang mga hinahangaan. Magaling ang bawat koponan, iba-iba ang kanilang strategy ng kanilang laro at hindi naglalayo ang mga scores nila. Kahit noong malapit nang matapos ng laro ay di inaasahang nagkaroon ng injury si Benjamin Alves na agad namang sinaklolohan ng ating Rescue group. Sa bandang huli ay nagwagi ang mga All-Star Celebrities sa score na 78-75. 

 Nabigyan ng pagkakataon ang mga fans na makapagpa picture sa mga players matapos ang laro. Kahit halatang pagod na ang mga players ay hindi pa rin sila umalis at nakipag selfie pa sa mga Baliwagenyo. 

Narito ang interview namin kay Rocco Nacino, may mensahe siya para sa mga fans na Baliwagenyo.  

Eco-Lamp Christmas Tree

Eco-Lamp Christmas Tree

Paskong Pasko na sa Baliwag

    Nakita na ba ninyo ang malaking Christmas Tree sa ating Heroes Park? Inilawan ito noong December 5, 2016. Alam niyo ba kung ano-ano ang mga ginamit na materyales para dito? Hindi basta-basta ang Eco-Lamp Christmas Tree na ito. Bakit? Narito ang mga detalye para sa inyong kaalaman.

     Isang proyekto ng Municipal Environment and Natural Resources o MENRO ang ating Eco-Lamp Christmas Tree na may layong gawing kapaki-pakinabang ang mga kalat sa ating paligid, at mabigyan ng mapagkakakitaan ang bawat pamilya na nakiisa. Ang ating "Giant Christmas tree" na may 32 feet na taas at may 450 na piraso ng Eco-Lamp na nakapalibot ay pinagtulung-tulungang mabuo ng MENRO at ng dalawampu't lima (25) na pamilya.  Sa mga nakakita na ng ating Christmas Tree, narito at bibigyan ko kayo ng kaunting kaalaman at mamangha kung paano at saan nanggaling ang mga kagamitan upang mabuo ito.

     Para makabuo ng 450 na Eco-Lamps, gumamit ng 35,000 piraso ng used o gamit nang plastic spoon at fork na nanggaling sa McDonald's Baliwag-Bayan at McDonald's SM City Baliwag. Para sa iba pang gamit, nakalikom ng 450 piraso ng used 1.5 liters plastic bottles mula sa mga sumusunod na paaralan:

Living Angels Christian Academy

Baliwag South Elementary School  

Gardeners Field School 

Catulinan Elementary School 

Immaculate Concepcion School of Baliuag 

Pinagbarilan Elementary School

Tiaong Elementary School

Fernandez College

Marian College

BCCSI (Bulacan College of Computer Science Inc.)

Ang mga ilaw naman na nagpaganda at nagpatingkad rito ay galing sa mga sumusunod na establisimyento:

Baliwag Transit Inc.

Hapchan

Waterwood Park

Gloria Romero's Restaurant

La Familia

AA Saver's Mart

     Maraming mga Bulakenyo ang nag-abang na masilayan ang pagsindi ng Giant Christmas Tree sa Heroes Park at Glorietta Park. Sinimulan ito ng isang programa kung saan naghandong muna ng awitin ang ilan nating kababayan gaya ng grupong Himig ni San Agustin Choir, nagbigay rin ng awitin si Arvie Esguerra, at hindi rin nagpahuli ang mga mang-aawit ng Municipal Choir. Nagsalita rin ang ating butihing Mayor Ferdie Estrella hatid ang maagang pagbati nya ng isang maligayang Pasko sa mga Baliwagenyo! Gusto ninyong masilip ang kaganapan na ito? Narito ang ilan sa naging programa at pagsisindi ng Giant Christmas Tree. 

     Inabangan ng lahat ang pagbilang ng emcee. Lahat ay nagbilang... 10, 9, 8. 7, 6, 5, 4, 3, 2, 1! At inilawan na nga ang Giant Christmas Tree ng Baliwag! Namangha ang lahat at kapansin-pansin na hindi magkamayaw ang mga Bulakenyo sa pagse-selfie at groupfie sa harapan ng Giant Christmas Tree. Ang ilan ay nakasama pa nga ang ating Mayor sa mga pictures. Masayang masaya ang lahat, ito na nga ang hudyat na Paskong Pasko na sa Baliwag!

Magiliw si Mayor Ferdie sa mga bata, kaya naman pati ang mga batang paslit ay hindi nya pinalampas at nagpalitrato rin siya kasama ang mga ito.

Maligayang Pasko Baliwagenyo!

CABALEN Restaurant - SM City Baliwag

   Mahilig tayong mga Pinoy na kumain. Halos lahat na yata ng mga bagong kainan ay sinusubukan. Pati naman ang mga Fiestahan ay hindi pinalalampas. Kabi-kabilaang fiestahan at handaan ay dinarayo. Dito sa SM City Baliwag ay nakita ko ang isang kainan na animo'y fiesta lagi. Ang CABALEN Restaurant. Masarap na kainan na puro putaheng Pinoy ang iyong makikita. Ikaw, ano ba ang paborito mong putahe?

Warning: ang mga ipapakita ko sa inyo ay talaga namang nakakatakam, kaya pinapayuhan ko kayo na matapos ninyong basahin ang blog ko ay bisitahin na sila upang matikman ang mga ibibida ko sa inyo rito. Narito ang ginawa kong video para makita ninyo Cabalen Restaurant. 

     Ang Cabalen ay isang Eat-All-you-Can buffet kung saan sa presyong 298 ay makakain mo na lahat ng gusto mong kainin at kahit pabalik balik ka pa sa kanilang buffet table ay sige lang.. sabi nga ng mga kabataan, "Lafang lang ng Lafang!" 

     Pagkita ko pa lamang ng kanilang Buffet table ay hindi ko malaman kung ano ang aking uunahing tikman. Hmmm dahil tanghalian na ay kailangan ko kumain ng kanin. Kanin pa lamang nila ay dalawang klase, may kanin na regular at isang espesyal na BERINGHE. Kaunti lamang ang kinuha ko dahil alam ko mabubusog kaagad ako sa pagkain ng Behinghe dahil siksik sa sahog, sa tingin ko nga, ito pa lamang ay mabubusog na ako dahil sakto ang kanyang lasa. Papalampasin ko ba naman na hindi matikman lahat? Syempre naman eat-all-you-can ang aking pinuntahan, kaya susulitin ko na at panandaliang kalimutan muna ang salitang "diet."

Beringhe

   Mula sa mga sizzling na sisig (bangus, pork at iba pa) ay mayroon din silang mga inihaw na isda, mga appetizers na talaga namang gaganahan ka kumain kapag nakita mo ang kanilang napaka lutong na Crispy Kangkong, Tokwa, Togue at may Vegetable salad din sila na ikaw na mismo ang gagawa kung anong gulay ang nais mong ilagay. Tayong mga Pinoy ay mahilig sa sawsawan kaya naman marami kang sawsawan na mapagpipilian ayon sa iyong panlasa.

 

     Tumungo naman ako sa lugar kung saan nakalagay ang Dinuguan na para sa akin ay perpekto ang pagkakaluto, tama lang ang asim (naka ilang balik nga ako para sa dinuguan). Laing na lasang lasa ang gata ng niyog at napakasarap. Ang kanilang Pochero ay manamis-namis ang lasa, sa tingin ko ay dahil ito sa sangkap na saging na saba at mais. Malambot din ang baka. Talaga namang masisimot mo hanggang sa buto. Mayroon din silang Ginataang Kuhol. Isa lang napansin ko rito, kapag sinabing "Ginataan" ang hindi tinitipid ang gata at talagang sagana sa gata ng niyog, kaya naman napaka sarap ng mga lutuin na ito. 

Dinuguan

Laing

Pochero

Ginataang Kuhol

     Mayroon din silang Caldereta, Kare-Kare na may kapares na bagoong. Hindi ko na iisa-isahin pa dahil alam ko naman na ngayon pa lamang ay natatakam na kayo sa mga ikinukuwento ko sa inyo, idagdag pa ang video at pictures na ipinakita ko sa inyo.

     Panghimagas o dessert ba? May Halo-Halo sila rito na ikaw mismo ang maglalagay kung ano-ano ang gusto mong isahog. Ginataang Mais, Kusilbang kamoteng-kahoy, Palitaw, Bico, prutas at mayroon pang chocolate fountain para sa marshmallows o prutas.

Talaga namang sulit ang kumain dito lalo na kung talagang magana kang kumain. Sa halagang 298 pesos ay busog na busog na. Kung nais ninyong makatipid, mayroong promo ang Cabalen ngayon na halagang 250 pesos lamang ang Eat-All-You-Can Buffet mula Lunes hanggang Biyernes sa mga oras na nakalagay sa kanilang poster. 

Ano pang hinihintay ninyo, sugod na sa Cabalen Restaurant sa Ground Floor ng SM City Baliwag ngayon!

Biyahe Tayo! : SavourLife Mushroom Farm

     Mahilig ba kayong kumain ng mushroom o kabute? Maaring ang ilan sa atin ay kumakain ng kabute ngunit hindi alam kung ano-ano ang makukuha nating sustansya mula dito. Alam ninyo bang mayroong mahigit na 10,000 na uri ng kabute sa buong mundo. Ang ilan sa mga ito ay maaring kainin at ang iba ay nakalalason.

     Sa aking paglilibot sa bayan ng Baliwag ay nakita ko sa Baliwag Pasalubong Center and isang booth na pumukaw ng aking paningin. Ang booth ng SavourLife (Organic Mushroom and Growing Supplies). Sa unang tingin ay hindi ko maiwasan na hindi usisain ang nagmamay-ari ng mga ito tungkol sa mga mushroom na nasa kanyang display. Si Ma'am Diwata Manguerra - Bautista ang nagbigay sa akin ng kaunting kaalaman patungkol sa mga kabute o mushroom. 

     Nabitin ako sa aming pagkukuwentuhan, kaya naman nagsadya ako sa kanyang mushroom farm sa Parulan, Plaridel, Bulacan upang makita kung paano niya ito inaalagaan at pinaparami. Naabutan ko siya na naghahanda para magtanim ng kanyang mga kabute. At siyempre kinuha ko na ang oportunidad upang maipakita nya sa akin ang pinaglalagyan ng mga ito. Pinatuloy nya ako sa isang animo'y kamalig kung saan naroon ang mga taniman ng kabute na napakaayos na nakasabit ng naka hilera sa mga lubid. Bawat lugar sa loob nito pala ay may mga stages ng pagpapalaki ng mga kabute upang malaman niya kung gaano na ka-mature ang mga ito. Napapalibutan ng mga screen at makapal na katsa ang lugar na ito. Alam nyo ba kung bakit? Hindi pala pwede na sobrang mahangin sa loob ng kanyang taniman. Inaalagaan nya rin ang tamang temperatura sa loob nito. Kapag sobrang mainit ang panahon, kanya daw binabasa ang paligid ng taniman nya para mapanatili ang humidity. Dalawang klase ang kanyang pinapatubo rito, ang Oyster mushroom at ang Milky mushroom. 

     Maraming proseso ang pagpaparami ng mga kabute pero sa tingin ko ay napakasaya at magiging accomplishment ito kapag naging maganda ang mga bunga nito. Ano-ano nga ba ang makukuha natin mula sa pagkain ng mga kabute? Ang mga kabute ay mabisang panlunas sa mga Cancer at Diabetes. Nakakapagpababa rin ito ng kolesterol sa katawan. Pwede rin sa mga gustong mag diet at nakakapaglakas ng ating immune system laban sa mga sakit. Kaya naman lalo ako namangha at gusto kong matutunan kung paano ako makakapagsimula sa  pagpapalaki ng mga kabute. 

     Nagkakaroon ng seminar si Ma'am Diwata tungkol sa pagpaparami at pagaalaga ng mga kabute. Isang araw ng hands-on na training kung paano gumawa ng binhi, paramihin at kung paano maaaring kumita sa pamamagitan ng mga kabute. Narito ang mga detalye:

SAVOURLIFE

Organic Mushroom & Growing Supplies

Hands-on Training on Home Grown Mushroom

Date: December 10, 2016

Time: 9:00am to 5:00pm

Venue: KLIR Waterpark Resort

(Kabilang Bakood, Sta. Rita, Guiguinto, Bulacan)

Para magpa-reserve ng inyong slot para sa training na ito, tumawag o magtxt lamang:

Ms. Diwata Manguerra-Bautista

0923-3976564 / 0923-4630019 

Matuto at magkaroon ng pangkabuhayan galing sa mga mushroom o kabute.